Frist for innspel: 22.04.2024

I samsvar med plan- og bygningslova (pbl) § 12-8 vert det meldt oppstart av detaljregulering for Røysaneset industribase – Høylandsbygd – 202/140 med fleire, PlanID 20230002.

Planarbeidet utløyser krav om planprogram med konsekvensutgreiing etter plan- og bygningslova § 12-9 jf. Forskrift om konsekvensutredninger § 6. Planprogrammet definerer rammene for det vidare planarbeidet, og fastset tema for vidare konsekvensutgreiing i planarbeidet. Planprogrammet vert samstundes med varsel om oppstart sendt på høyring og offentleg ettersyn jf. pbl § 12-9.

Planstatus: Oppstart av planarbeid, samt høyring og offentleg ettersyn av planprogram

Saksnummer: 2023/1710

Plantype: Privat detaljregulering

PlanID: 20230002

Forslagstillar: Røysaneset industribase AS, Halsnøy industribase AS

Plankonsulent: ABO Plan & Arkitektur Stord AS

Planprogram og andre plandokument er tilgjengeleg i planregisteret under planbehandlingar. 

Føremål
Planarbeidet har som føremål å leggje til rette for vidareutvikling av maritim industri på eksisterande næringsområde til sjø i Høylandsbygd på Halsnøy. Det har vore aktiv industridrift på området sidan 1970-talet. Det er planar om å vidareføre dagens aktivitet på området, samt utvide og foredle anlegga og aktiviteten. I dag er området nytta til ulike typar maritime tenester, der m.a. Halsnøy Dokk, Tronds Marine Service og Elektroen AS er etablert med skipsverft, industribase, verkstad, lager og kontor.

Planområdet på 507 daa er avgrensa eksisterande næringsområde med tilhøyrande sjøareal, tilkomstveg og delar av friluftsområde. Den vidare utviklinga inneber tilrettelegging av nytt kaianlegg med utfylling i sjø og tilrettelegging av nye bygnadar. I tillegg til opprusting av eksisterande kai og dokk. Det inneber også terrenginngrep i innanfor eksisterande næringsområde for å sikre større areal for næringsutvikling på land. Planområdet skal også sikre naudsynt sjøareal for manøvrering og ferdsel for fartøy i sjø. 

Planområdet ligg tett på eksisterande bustad- og friluftsområde, inkludert småbåthamn. Planarbeidet inneber også trafikksikring av Slettanesvegen og Røysanesvegen med tilrettelegging av fortau, og forbetring av tilkomstveg til Hillestad. Trafikksikringstiltak vil kunne råke dyrka mark og private eigedommar. Tilhøve til friluftsområde skal vidare vurderast i prosessen. Plangrensa vil kunne bli redusert til å berre omfatte areal som det er trong for å regulere som del av planarbeidet. 

Planstatus
I gjeldande kommuneplan for Kvinnherad 2018-2026 er planområdet avsett til næringsføremål (BN79), bustad, hamn, LNF og LNF-spreidd. Sjøområdet er regulert til bruk og vern av sjø og vassdrag, samt Ferdsel (VFE11-12). 

I gjeldande reguleringsplan for Slettaneset, Høylandsbygd, deler av gnr. 202 (PlanID 19800004) er planområde regulert til industri, friluftområde og bustadområde langs tilkomstveg. Gjeldane reguleringsplan gjeld samen med kommuneplanen gjennom føresegnsområde #A. Detaljreguleringa vil erstatte delar av gjeldande reguleringsplan for Reguleringsplan for Slettaneset, Høylandsbygd, deler av gnr. 202 og Reguleringsplan for småbåthamn Høylandsbygd (PlanID 20090008) når planen er vedteken. 

Planprogram, konsekvensutgreiing og ROS-analyse
Planarbeidet utløyser krav om planprogram med konsekvensutgreiing etter plan- og bygningslova § 12-9 jf. Forskrift om konsekvensutredninger § 6. Planprogrammet definerer rammene for det vidare planarbeidet, og fastset tema for vidare konsekvensutgreiing i planarbeidet jf. pbl § 4-2 og ROS-analyse jf. pbl § 4-3.

Planprogrammet føreslår følgjande utgreiingstema for konsekvensutgreiing: 

• Naturmangfald (Verknadar for kjente registreringar og vassmiljø
• Landskap (Verknadar for eksisterande bustadområde, fjern- og nærverknad)
• Strandsone og friluftsliv (Verknad for bruk, visuelt og opplevingsverdi)
• Naturressursar
  Fiskeri (Verknad for kjente fiskeplassar og låssettingsplassar)
  Jordbruksareal (Verknad for dyrka mark ved utbetring av vegstandard)
• Transport 
  Vegtrafikk (Verknad av trafikk på land, trafikktryggleik, kapasitet og trafikkmengd)
  Ferdsel på sjø (Verknad for sjøvertsferdsle og ankringsområde)
• Klimagassutslepp
• Forureina grunn

I ROS-analyse vil trafikk, trafikktryggleik, støy, forureining i grunn/sjø, auka vasstand og grunntilhøve, medan kulturminne, naturressursar, jordbruk, folkehelse og barn- og unges interesser er føreslått som del av planomtalen. 

Medverknad
Det vert lagt opp til eit ope informasjonsmøte 11.04.2024 kl. 17:00 i administrasjonsbygget til Tronds Marine (Røysanesvegen 18) i Høylandsbygd i samband med oppstart av planarbeid, med føremål om å informere om og få innspel til planarbeidet. 

Har du Innspel til planarbeidet eller merknad til planprogrammet?
I denne fasen av planprosessen kan ein komme med innspel til oppstart av planarbeid og merknad til planprogram på høyring og offentleg ettersyn. Planprogrammet kan lastast ned frå planregisteret under planbehandlingar.  

Innspel kan sendast til på e-post til poststord@abo-ark.no eller som brev til ABO Plan & Arkitektur Stord AS, Postboks 32, 5401 Stord, innan frist 22.04.2024.

Spørsmål kan rettast til turid@abo-ark.no. 

Etter at frist er utløpt vil planprogram bebreidast på grunnlag av innkomne merknader i samråd med kommunen før det fastsetjast gjennom politisk behandling. Innspel til oppstart av planarbeidet vert vurdert saman med kommunen, og ligg til grunn for utarbeiding av planforslag.