Høyring og offentleg ettersyn – Detaljregulering for Steinparken – Rosendal – 85/4 og 85/2 med fleire

Plan-, teknikk- og miljøutvalet vedtok 11.11.2025 at detaljregulering for Steinparken – Rosendal – 85/4 og 85/2 med fleire (PlanID 20230003) skal sendast på høyring og offentleg ettersyn.

Planstatus: Høyring og offentleg ettersyn

Plantype: Privat detaljregulering

PlanID: 20230003

Forslagstillar: Rosendalsstiftinga

Plankonsulent: Byggadministrasjonen Harald Bjørndal AS

Om planforslaget

Føremålet med planarbeidet er å leggje til rette for vidareutvikling av Steinparken. Planforslaget legg til rette for friluftsområde for ålmenta med gangstiar og bruer, hytter for utleige til overnatting og andre aktivitetar.

Plandokumenter er tilgjengeleg i planregisteret her Lenke til et annet nettsted..

Plan-, teknikk- og miljøutvalet vedtok at hengebru over Melselva skulle regulerast inn i planforslaget før høyring og offentleg ettersyn. Hengebru er vist innanfor føresegnsområde #1-6 i plankartet på eigedom 85/7. Ei hengebru vil kunne bidra til å auke gangtilgjengelegheit i tilknytning til Steinparken mot omkringliggjande friluftsområdar, og kan føre til auka ferdsel i området i forhold til friluftsliv og turisme. Konsekvensar kan vere slitasje på eksisterande sti langs Melselva. Rosendalsstiftinga hadde i oppstartsfasen i 2024 av planarbeidet intensjon om å leggje til rette for hengebru i tilknytning til Steinparken ved eigedom 85/4, men hengebru vart ikkje tatt med vidare etter medverknadsprosessen, slik at forslaget om hengebru er eit politisk vedtak.

Planforslaget opnar vidare for utleige til overnatting i to hytter på bakkenivå innanfor UTL2 og i ein eksisterande tretopphytte innanfor UTL2. Utleige til overnatting i Steinparken kan ha konsekvensar for ålment friluftsliv. Lokalisering er føreslått i nærleiken av Dinosaurhuset for å i nokon grad avgrense påverknad på dagens bruk av Steinparken.

Innanfor friluftsområde (FL) er det lagt til rette for føresegnsområder (#1-2, #1-3, #1-4), der det kan leggjast til rette for bygning for aktivitetsrom for utleige, utgravingsområde for fossilar og eksisterande grindbygg.

Vangssago ligg innanfor planområdet som vern av kulturminne/kulturmiljø. Innanfor føresegnsområde #1-1 ved parkeringsplass er det lagt til rette for grindbygg for Vangssago for lagring av material og utstyr.

Naturområde (N) med tilhøyrande omsynsone for natur er vidare sikra i planforslaget med føremål om å ivareta naturmangfald langs elv og bekker i planområdet.

Planområdet er vidare omfatta av faresone for flaum langs Melselva og faresone for høgspent for eksisterande høgspentlinjer. Risiko og sårbarheit er nærmare vurdert i ROS-analysen.

Det er lagt til rette for parkeringsplass på f_P1. Det er utarbeidd parkeringsanalyse som viser at areal før for Vangssago kan nyttast til mellombels parkering ved større arrangement i Steinparken. Parkering på f_P1 er begrensa i tal på parkeringsplassar. Det er sikra parkering for hytter for utleige til overnatting (UTL1-2) innanfor f_P1. I planprosessen har det vore kjent at det er utfordringar med parkering i Steinparken, men samstundes ligg Steinparken sentrumsnært i forhold til omkringliggjande parkering.

Planforslaget legg til rette for friluftsområde med gangstiar, bruer, aktivitetar, parkering og samstundes opne for utleige i hytter på bakkenivå og i eksisterande tretopphytte.

Plan-, teknikk- og miljøutvalet fatta vedtak om at hengebru over Melselva som var tatt ut av planforslaget etter oppstart av planarbeidet skulle innarbeidast i planen før høyring og offentleg ettersyn. Hengebru er vist i plankartet innanfor #1-6 med tilhøyrande føresegn.

Før høyring og offentleg ettersyn er det gjort tekniske justeringar av eigarform og føresegnsområde jf. vilkåra, og fare for områdeskred er dokumentert i ROS-analyse jf. NVE si rettleiar: Sikkerheit mot kvikkleireskred. Før 2. gangsbehandling skal gangvegar inkludert bruer regulerast med tilstrekkeleg breidde som ivaretek framkommelegheit jf. vilkåra.

Planstatus

I gjeldande kommuneplan for Kvinnherad 2016-2026 er planområdet avsett til landbruk, natur og friluftsområde. Arealføremålet opnar ikkje opp for vidare utvikling av Steinparken, og er grunnlaget for at det er starta opp planarbeid. I kommuneplanen er Vangssago avsett til privat og offentleg tenesteyting. Planforslaget er difor delvis i samsvar med overordna plan når det gjeld friluftsliv og natur.

Korleis medverke?

For å medverka i den vidare planprosessen kan du sende inn merknad.

Merknad til planforslaget sendast inn via skjema her Lenke til et annet nettsted, åpnes i nytt vindu. innan frist 22.01.2026.

Alternativt kan merknad sendast inn på e-post til post@kvinnherad.kommune.no, eller som brev til Kvinnherad kommune, Rosendalsvegen 10, 5470 Rosendal. Oppgje saksnummer 2023/2617 ved innsending av merknad på e-post eller som brev.

Når merknadsfristen er utgått vert merknader handsama. Det vert vidare gjennomført justeringar av planforslaget før sluttvedtak. Når planforslaget er vedteken vert det straks bindande for arealbruk innanfor planområdet. Eit planvedtak er eit enkeltvedtak som kan påklagast.