Høyring – Forslag om innføring av meldeplikt for hogst over 3 dekar i Kvinnherad kommune

Kvinnherad kommune sender med dette på høyring forslag til lokal forskrift om meldeplikt ved hogst av skog i område større enn 3 dekar. Forslaget er heimla i skogbrukslova § 11 og gjeld all skog og skogmark innanfor kommunegrensene i Kvinnherad.

Føremålet med forskrifta er å sikre at kommunen har tilstrekkeleg oversikt over større hogsttiltak og styrke kommunen sin rolle i skogforvaltninga. Den vil sikre ei meir berekraftig bruk av skogressursane og legg til rette for betre dialog mellom skogeigarar og myndigheiter i tillegg til å betre samordning mellom hogst og annan arealbruk og planlegging.

Forskrifta inneber at alle som planlegg å hogge skog i område større enn 3 dekar må sende melding til kommunen minst 3 veker før tiltaket blir sett i gang. Forslaget inneheld nærare krav til kva ei slik melding skal innehalde.

Det blir arrangert eit infomøte om meldeplikt for hogst onsdag 28. august kl. 18 i Rosendal rådhuset – kommunestyresalen.

Høyringsperiode:

Forslaget er lagt ut til offentleg høyring i 6 veker, med frist for innspel innan 22. september 2025.

Høyringssvar kan sendast til:

E-post: post@kvinnherad.kommune.no

Postadresse: Kvinnherad kommune, Rådhuset, Rosendalsvegen 10, 5470 Rosendal

Merk svaret med: Høyring – forskrift om meldeplikt for hogst

Vedlagt i høyringa:

• Forslag til forskrift om meldeplikt ved hogst over 3 dekar i Kvinnherad kommune pdf, 35 kB, åpnes i nytt vindu.
• Saksprotokoll Meldeplikt for hogst av skog i Kvinnherad kommune pdf, 137 kB, åpnes i nytt vindu.

Vi oppmodar grunneigarar, skogbruksaktørar, organisasjonar og andre interesserte til å komme med synspunkt og innspel innan fristen.