Høyring og offentleg ettersyn - Forskrift om gebyr for sakshandsaming og kontroll etter forureiningsregelverket.
Følgebrev til forskrift om gebyr for sakshandsaming og kontroll etter forureiningsregelverket for Kvinnherad kommune, Vestland fylke.
Kvinnherad kommune legg med dette framlegget forskrift om gebyr for sakshandsaming og kontroll etter forureiningsregelverket ut på høyring. Frist for innsending av utsegner er satt til 24. januar 2025. Høyringssvar kan sendast til post@kvinnherad.kommune.no eller til Kvinnherad kommune, merk 2024/5210, Rosendalsvegen 10, 5470 Rosendal.
Formål og verkeområdet til forskrifta
Forskrifta har som formål å gje kommunen heimel til å dekka kostnadane ved sakshandsaming, tilsyn og kontroll som kommunen har som forureiningsmynde etter forureiningslova, forureiningsforskrifta og forskrift om forbud mot bruk av mineralolje til oppvarming av bygninger.
Forskrifta omfattar forhold der kommunen er myndeutøvar etter kapitla 2, 12, 13, 15 og 15A i forureiningsforskrifta og i forskrift om forbud mot bruk av mineralolje til oppvarming av bygninger. Kommunen skal òg føre tilsyn med at føresegner og vedtak som er fatta, vert fylgt.
Forskrifta omfattar gebyr for sakshandsaming, tilsyn og kontroll med:
1. Opprydding i forureina grunn ved bygge- og gravearbeid.
2. Utslepp av sanitært avløpsvatn frå bustadhus, hytter og liknande.
3. Utslepp av kommunalt avløpsvatn frå mindre tettbygd område.
4. Utslepp/påslepp av oljehaldig vatn.
5. Påslepp av feitthaldig vatn.
6. Forbod mot bruk av mineralolje til oppvarming av bygningar.
Sentrale føresegner om gebyr og sjølvkostrekning
Ny kommunelov § 15-1 seier at samla sjølvkost for ei teneste skal svare til meirkostnaden ved å yte tenesta. Forureiningsforskrifta §§ 2-12 og 11-4 seier at gebyra vert sett slik at dei samla ikkje overstig kostnadane kommunen har ved sakshandsaminga eller kontrollordninga, jf. forureiningslova § 52a. Ramma for gebyra må fastsetjast i kommunal forskrift.
Ved utrekning av sjølvkost skal forskrift for utrekning av sjølvkost leggjast til grunn. Over- eller underskot i det enkelte år skal avsetjast eller trekkast frå bundne driftsfond. Avsett overskot frå det enkelte år blir ført tilbake til abonnentane i form av lågare årleg gebyr i løpet av ein periode på fem år. Tilsvarande vil underskot bli dekka inn over årlege gebyr i løpet av ein periode på fem år. Gebyra kan ikkje brukast til å finansiere andre delar av drifta til kommunen.
Lokale gebyrforskriftar
Kvinnherad kommune har fram til no ikkje hatt ein gebyrforskrift som dekkjer det arbeidet kommunen er pålagt å gjere i samband med å vere forureiningsmynde. Frå 2025 ynskjer kommunen å sikre finansiering av sakshandsaminga og kontrollen/tilsynet dei fører, og har difor utarbeidd denne lokale gebyrforskrifta.
Ny forskrift
§§ 1.3 til 1.6 omhandlar generelle føresegner og overordna reglar for sakshandsaming som gjeld kapittel 2 til 7 i forskrifta.
I gebyrforskrifta har kapittel 2 til 6 ei todelt inndeling. Det vil seie at tiltakshavar betalar både gebyr for sakshandsaming og gebyr for kontroll/tilsyn. Gebyret for sakshandsaming er eit eingongsgebyr. I kapittel 3, 4, 5 og 6 vil eigar av anlegg måtte betale årleg gebyr for kontroll/tilsyn. I kapittel 2 og 7 er gebyret for kontroll/tilsyn eit eingongsgebyr.
Kommunen har høve til å ta eit årleg gebyr for kontroll og tilsyn for å dekkje kostnaden dei har som forureiningsmynde etter forureiningsforskrifta kapittel 12, 13, 15 og 15A. Kommunen har høve til å krevje dette gebyret årleg, sjølv om tilsyn og kontroll gjennomførast sjeldnare enn kvart år. Dette er i tråd med rettleiaren til forureiningsforskrifta § 11-41 som er utarbeidd av Miljødirektoratet. Gebyrplikta opphevast anten ved at kommunen tek imot skriftleg, fagkunnig dokumentasjon om at anlegga er forskriftsmessig teke ut av drift, eller at krav om utsleppsløyve ikkje gjeld lenger.
Kvinnherad kommune har våren/sommaren 2021 gjort eit overslag over kva samla årlege kostnadar for området kjem til å vere, samt kva éin sakshandsamingstime kostar når leiing, vare- og tenestekjøp og fordelte administrasjonskostnader er rekna med. For 2022 er dette anslaget ca. 900 kr/t.
Utrekningane dannar grunnlag for gebyrsatsane som kjem fram av det årlege gebyrregulativet. For kvart gebyr er det estimert kor mange sakshandsamings- og/eller tilsynstimar som kommunen brukar i gjennomsnitt.
Gebyr for sakshandsaming og kontroll med opprydding i forureina grunn ved bygge- og gravearbeid
Kapittel 2 omhandlar gebyr for sakshandsaming og kontroll med opprydding i forureina grunn ved bygge- og gravearbeid. Gebyra består av et eingongsgebyr for sakshandsaming av søknad om godkjenning av tiltaksplan og eit eingongsgebyr for kontroll. Forskrifta opnar for at kontrollgebyret kan differensierast etter tiltakets samla areal.
Arbeidsgruppa har føreslått to arealintervall for kontrollgebyret; areal inntil 2 daa og areal større enn 2 daa. Arbeidsgruppa gjeng ut i frå at denne differensieringa fangar opp meirarbeid som er knytt til storleiken på tiltaket på ein god måte. Det er lagt til grunn at kontrollgebyret blir fakturert saman med sakshandsamingsgebyret og før kontrolloppgåva gjennomførast.
Forskrifta opnar for å gje tilleggsgebyr for tiltak i særleg sårbare område. Særleg sårbare område definerast etter kommuneplanen og brukarinteresser.
Forskrifta opnar også for å gebyrleggje tiltakshavar dersom søknaden som kommunen tek imot er mangelfull. Gebyret skal dekke den gjennomsnittlege tida kommunen brukar på å skaffe dei nødvendige opplysningane, opplyse tiltakshavar om manglar, eller liknande arbeid i samband med mangelfulle søknader.
Gebyr for sakshandsaming og kontroll med utslepp av sanitært avløpsvatn
Kapittel 3 er knytt til kapittel 12 i forureiningsforskrifta, som har øvre grense på 50 personekvivalentar (pe). Kapittelet omhandlar gebyr for sakshandsaming og kontroll med utslepp av sanitært avløpsvatn. Dette gjeld typisk slamavskiljar, minireinseanlegg mv. for eigedomar som ikkje er kopla til kommunen sitt avløpsnett. Kommunen har per 23.06.2021 til saman 2855 anlegg av ein slik art.
Det er føreslått eit sakshandsamingsgebyr for nye søknadar om utsleppsløyve og eit gebyr for søknad om endring av eksisterande utsleppsløyve. Kommunen tar i tillegg tilleggsgebyr rekna ut ifrå den gjennomsnittlege tida kommunen brukar for søknader som ikkje er komplett jf. § 3.4 i forskrifta.
Kontrollgebyret kan differensierast mellom ulike typar anlegg og er eit årleg gebyr som skal finansiere kommunen sin løypande kontroll og oppfølging av leverandørrapportar, rapporterte avvik og fysisk tilsyn. Per i dag fakturerer kommunen etter kvart utført tilsyn. Fordelen med å endre denne praksisen til å fakturere alle anlegg årleg, er at kommunen får ei meir jamn inntekt, samtidig som at kommunen sin oppgåve som tilsynsmynde mest sannsynleg vil gjennomførast jamnare enn tidlegare.
Gebyr for sakshandsaming og kontroll med utslepp av kommunalt avløpsvatn frå mindre tettbygde område
Kapittel 4 er knytt til kapittel 13 i forureiningsforskrifta, som gjeld utslepp frå 50 pe til enten 2000 pe, dersom utslepp til ferskvatn eller elvemunning og 10 000 pe dersom utslepp til sjø. Kapittelet omhandlar gebyr for sakshandsaming og kontroll med utslepp av kommunalt avløpsvatn frå mindre tettbygde område. Dette gjeld mindre kommunale reinseanlegg. Her er kommunen forureiningsmynde for kommunen sjølv. Det er etter kva arbeidsgruppa kjenner til 47 slike anlegg i Kvinnherad kommune per juni 2021.
Sakshandsamingsgebyret for handsaming av ny utsleppsløyve er differensiert etter utslepp frå 50 – 500 pe og utslepp frå 501 til 10.000 pe. Det er eit eiget særskild gebyr for endring av utsleppsløyve.
Kontrollgebyret er likt for alle anlegg og er eit årleg gebyr.
Kommunen tek tilleggsgebyr rekna ut ifrå den gjennomsnittlege tida kommunen brukar for søknadar som ikkje er komplett jf. § 4.4 i forskrifta.
Gebyr for sakshandsaming og kontroll med utslepp eller påslepp av oljehaldig avløpsvatn
Kapittel 5 omhandlar gebyr for sakshandsaming og kontroll med utslepp eller påslepp av oljehaldig avløpsvatn. I sentral forskrift er det lista opp kva for anlegg som omfattast av pålegg om sakshandsaming og kontroll, bl.a. bensinstasjonar, vaskehallar og motorverkstader. Kommunen har per juni 2021 ca. 8 oljeutskiljarar.
Gebyra består av eit eingongsgebyr for sakshandsaming av søknad om løyve til utslepp eller påslepp av oljehaldig avløpsvatn og eit årleg kontrollgebyr per anlegg. I tilfelle der det blir søkt om endring av utsleppsløyve eller ved utskifting av anlegg, kjem det til eit eige, særskilt sakshandsamingsgebyr. Kommunen tek tilleggsgebyr rekna ut ifrå den gjennomsnittlege tida kommunen brukar på søknadar som ikkje er komplett jf. § 5.4 i forskrifta.
Gebyr for sakshandsaming og kontroll av feitthaldig avløpsvatn
Kapittel 6 omhandlar gebyr for sakshandsaming og kontroll av feitthaldig avløpsvatn frå verksemder. Næringsmiddelprodusentar, restaurantar og liknande er typiske verksemder som omfattast av denne føresegna.
Gebyra består av eit eingongsgebyr for sakshandsaming av søknad om løyve til påslepp av feitthaldig avløpsvatn frå verksemder og eit årleg kontrollgebyr per feittutskiljar. I tilfelle der det blir søkt om endring av utsleppsløyve eller ved utskifting av feittutskiljar, kjem det til eit eiga, særskilt sakshandsamingsgebyr.
Kommunen tek tilleggsgebyr rekna ut ifrå den gjennomsnittlege tida kommunen brukar på søknadar som ikkje er komplett jf. § 5.4 i forskrifta.
Gebyr for tilsyn med forbod mot fyring med mineralolje
Kapittel 7 omhandlar gebyr for kommunen si tilsynsplikt i samband med forbodet mot fyring med mineralolje etter forskrift om forbod mot bruk av mineralolje til oppvarming av bygningar.
Innanfor dette området vil heimelshavar bli belasta med eit tilsynsgebyr når kommunen har utført tilsynet. Gebyret differensierast i to grupper:
1. Einebustad/ bustader med inntil 4 bueiningar
2. Bustader med fleire enn 4 bueiningar/andre bygg.
Grunnen til inndelinga er at kommunen antar at det i gjennomsnitt vil ta noko lengre tid å føre tilsyn med bygg med mange bueiningar.
Arbeidsgruppa
Framlegg til forskrift om gebyr for sakshandsaming, kontroll og tilsyn etter forureiningsregelverket er utarbeida av representantar frå Kvinnherad kommune. EnviDan AS har vore sparringspartnar.
Målsettinga med arbeidet har vore å lage ei forskrift som er rettferdig, tydeleg og fleksibel. Rettferdig: Gebyra skal spegla kostnadane knytt til dei ulike tiltakshavarane og eigarane av anlegg/feittutskiljarar best mogleg.
Tydeleg: Forskrifta skal være lett å lese og handheve med klart og forståeleg språk utan uklare, eller vanskelege formuleringar.
Fleksibel: Forskrifta viser til årlege kommunestyrevedtak når det gjeld storleiken på gebyra.
Kvinnherad kommune ser fram til høyringssvar.
Forskrift om gebyr for sakshandsaming og kontroll etter forureinings-regelverket, Kvinnherad kommune, Vestland fylke
Heimel: Fastsett av Kvinnherad kommunestyre dd.mm 2024 med heimel i lov 13. mars 1981 nr. 6 om vern mot forurensninger og om avfall (forurensningsloven) § 52 a og forskrift 1. juni 2004 nr. 931 om begrensning av forurensning (forurensningsforskriften) av §§ 2-12 og 11-4 og forskrift 28. juni 2018 nr. 1060 om forbud mot bruk av mineralolje til oppvarming av bygninger § 11.
Kapittel 1. Generelle føresegner
§ 1-1. Formålet til forskrifta
Forskrifta gir kommunen heimel til å dekka kostnadane ved sakshandsaming, tilsyn og kontroll som kommunen har som forureiningsmynde etter forurensningsloven, forurensningsforskriften og forskrift om forbud mot bruk av mineralolje til oppvarming av bygninger.
§ 1-2. Verkeområdet til forskrifta
Forskrifta omfattar forhald der kommunen er myndeutøvar etter kapitla 2, 12, 13, 15 og 15A i forurensningsforskriften og i forskrift om forbud mot bruk av mineralolje til oppvarming av bygninger.
Forskrifta omfattar gebyr for sakshandsaming, tilsyn og kontroll med:
1. Opprydding i forureina grunn ved bygge- og gravearbeid (forurensningsforskriften § 2-12)
2. Utslepp av sanitært avløpsvatn frå bustadhus, hytter og liknande (forurensningsforskriften § 11-4, jf. § 12-4)
3. Utslepp av kommunalt avløpsvatn frå mindre tettbygd område (forurensningsforskriften § 11-4, jf. § 13-4)
4. Utslepp/påslepp av oljehaldig vatn (forurensningsforskriften § 11-4, jf. § 15-4)
5. Påslepp av fetthaldig vatn (forurensningsforskriften § 11-4, jf. § 15A-4)
6. Forbod mot bruk av mineralolje til oppvarming av bygningar (forskrift om forbud mot bruk av mineralolje til oppvarming av bygninger, § 11).
§ 1-3. Kva gebyra dekker
Gebyr etter denne forskrifta skal dekka kostnadane kommunen har med sakshandsaming og kontroll eller tilsyn på dei områda forskrifta omfattar, medrekna løpande dokument- og systemkontroll og stadlege tilsyn etter vurdering av behov.
Gebyra skal ikkje overstiga kostnadane kommunen har ved sakshandsaming eller tilsyns- og kontrollordningar, og blir rekna ut i tråd med sjølvkostprinsippet.
Gebyrsatsar etter denne forskrifta inngår i betalingsregulativet og blir vedtatt årleg av kommunestyret.
§ 1-4. Gebyrplikt
Gebyr for kontrolltiltak kan fastsetjast som årlege gebyr, sjølv om kontrolltiltak for det enkelte anlegget eller tiltak blir gjennomført sjeldnare enn kvart år.
Gebyrplikt for årlege gebyr trer inn frå og med den datoen bruksløyve for anlegget er gitt.
§ 1-5. Gebyrfritak
Gebyrplikt for årlege gebyr blir stansa frå og med den datoen kommunen mottar fagkunnig dokumentasjon på at anlegget er tatt ut av drift.
Kommunen kan krevje gebyr etterbetalt frå tidpunktet gebyrfritak er innvilga, dersom anlegget takast i bruk utan kommunen si godkjenning.
§ 1-6. Betaling
Den som får utført tenester etter dette regulativet skal betala gebyr. Storleiken på gebyret skal fastsetjast
basert på det regulativet som gjeld når tenesta vert utført, tidspunktet tenesta gjeld eller når ein søknad er
klar til handsaming. Kommunedirektøren kan i særskilde høve krevja at gebyr er betalt før
tenesta vert utført eller løyve vert gitt.
Klage på fastsetjinga medfører ikkje at betalingsfristen blir utsett.
Dersom kommunen har motteke for stort gebyr skal dette betalast tilbake. Det kan ikkje krevjast
rentetillegg av denne summen.
Ved for sein betaling vil det påkome forseinkingsgebyr. Betalingspåminning og inkassovarsel kan medføre ekstrakostnad. Om ikkje faktura er betalt innan fristen i inkassovarselet, vil det bli sendt ei
betalingsoppfordring. Gebyr for forseinka betaling føl ei kvar tid gjeldande satsar i
inkassoforskriften.
Fullt sakshandsamingsgebyr skal betalast òg ved avslag på søknad.
Gebyra er tvangsgrunnlag for utlegg jf. forurensningsloven § 52 og tvangsfullbyrdelsesloven § 7-2 bokstav e.
§ 1-7. Klage
Betalingskrav som er fastsett ut i frå dette betalingsregulativet er ikkje eit enkeltvedtak som kan påklagast
etter forvaltningsloven. Dersom betalingskravet er fastsett ved skjøn (tidsbruk, nedsetting av urimelege
gebyr og liknande) er dette eit enkeltvedtak med klagerett. Klagar på skjønsfastsette gebyr skal rettast til
den eininga som har fastsett kravet, som sender klagen vidare til rett klageinstans dersom fastsetjinga vert
oppretthalden.
§ 1-8. Mangelfull søknad
Dersom søknaden som kommunen mottek er mangelfull, kjem det tilleggsgebyr. Tilleggsgebyret vert rekna ut ifrå den gjennomsnittlege tida kommunen brukar på å skaffa dei nødvendige opplysningane, opplysa tiltakshavar om manglar, eller liknande arbeid i samband med mangelfulle søknader.
§ 1-9. Gebyr for avslutta sak før vedtak
For saker som trekkjast før endeleg vedtak, men etter at kommunen har motteke komplett søknad og sakshandsaminga er satt i gang, skal det betalast 50 % av sakshandsamingsgebyret.
§ 1-10. Gebyr for anna fakturerbart arbeid
Gebyrpliktig arbeid etter forurensningsforskriften kapittel 2, 12, 13, 15 og 15 A og forbud mot bruk av mineralolje til oppvarming av bygninger som ikkje fell inn under andre føresegner i denne forskrifta, fakturerast etter tida som er gått med. I spesielle / atypiske saker kan kommunen avgjere at saka blir fakturert etter tida som er gått med.
Kapittel 2. Gebyr for sakshandsaming og kontroll med opprydding i forureina grunn ved bygge- og gravearbeid
§ 2-1. Verkeområde
Kapittelet gjeld gebyr for arbeid kommunen har med sakshandsaming og kontroll i samband med opprydding i forureina grunn ved bygge- og gravearbeid, jf. kapittel 2 i forurensningsforskriften.
§ 2-2. Gebyr for sakshandsaming og kontroll ved søknad om godkjenning av tiltaksplan
Det skal betalast eingongsgebyr for sakshandsaming og for kontroll ved søknad om godkjenning av tiltaksplan.
Gebyra dekker sakshandsaminga til kommunen og oppgåvene kommunen har med kontroll og oppfølging i etterkant.
Sakshandsamingsgebyret er likt og blir fakturert per tiltaksplan.
Kontrollgebyret differensierast i to intervall etter det samla arealet av tiltaket.
1. Areal inntil 2 daa
2. Areal større enn 2 daa
For tiltak i særleg sårbare område kjem eit tilleggsgebyr.
Særleg sårbare område definerast etter naturmangfaldlova, vassforskrift, kommuneplanen og brukarinteresser.
Gebyret blir belasta tiltakshavar.
Kapittel 3. Gebyr for sakshandsaming og kontroll med utslepp av sanitært avløpsvatn
§ 3-1. Verkeområde
Kapittelet gjeld gebyr for arbeid kommunen har med sakshandsaming og kontroll av utslepp av sanitært avløpsvatn frå bustadhus, hytter og liknande, jf. kapittel 12 i forurensningsforskriften.
§ 3-2. Sakshandsamingsgebyr for handsaming av søknad om utsleppsløyve
Det skal betalast eit gebyr for sakshandsaming ved:
1. Ny søknad om utsleppsløyve.
2. Søknad om endring av utsleppsløyve.
Gebyret blir belasta tiltakshavar.
§ 3-3. Årleg gebyr for kontroll/tilsyn av anlegg med utslepp av sanitært avløpsvatn
Det skal betalast eit årleg gebyr for kontroll og tilsyn av avløpsanlegg.
Gebyret blir rekna per anlegg. Gebyret kan differensierast mellom ulike typar anlegg.
Det årlege gebyret blir belasta eigar av avløpsanlegg.
Kapittel 4. Gebyr for sakshandsaming og kontroll med utslepp av kommunalt avløpsvatn frå mindre tettbygde område
§ 4-1. Verkeområde
Kapittelet gjeld gebyr for arbeid kommunen har med sakshandsaming og tilsyn/kontroll av utslepp av kommunalt avløpsvatn frå mindre tettbygde område, jf. kapittel 13 i forurensningsforskriften.
§ 4-2. Sakshandsamingsgebyr for handsaming av søknad
Det skal betalast eit eingongsgebyr for sakshandsaming ved:
1. Søknad om utsleppsløyve frå 50 – 500 personekvivalentar (pe).
2. Søknad om utsleppsløyve frå 501 – 10.000 pe.
3. Søknad om endring av utsleppsløyve.
Gebyret blir belasta tiltakshavar.
§ 4-3. Årleg gebyr for kontroll/tilsyn av anlegg med utslepp
Det skal betalast eit årleg gebyr for kontroll og tilsyn av avløpsanlegg.
Gebyret blir rekna per anlegg.
Det årlege gebyret blir belasta eigar av avløpsanlegg.
Kapittel 5. Gebyr for sakshandsaming og kontroll med utslepp eller påslepp av oljehaldig avløpsvatn
§ 5-1. Verkeområde
Kapittelet gjeld gebyr for sakshandsaming og kontroll/tilsyn kommunen har med utslepp eller påslepp av oljehaldig avløpsvatn frå:
a. bensinstasjonar
b. vaskehallar for køyretøy
c. motorverkstadar
d. bussterminalar
e. verkstadar og sentralar for klargjering av køyretøy, anleggsmaskinar og skinnegåande materiell
f. anlegg for handsaming av understell
som enten har vaskeplass, smørjehall, servicehall eller liknande, jf. kapittel 15 i forurensningsforskriften.
§ 5-2. Sakshandsamingsgebyr for handsaming av søknad om utslepps/påslepps-løyve
Det skal betalast eit gebyr for sakshandsaming ved:
1. Søknad om løyve til utslepp eller påslepp av oljehaldig avløpsvatn.
2. Søknad om endring av løyve til utslepp eller påslepp av oljehaldig avløpsvatn.
Gebyret blir belasta tiltakshavar.
§ 5-3. Årleg gebyr for kontroll/tilsyn av anlegg med utslepp/påslepp av oljehaldig avløpsvatn
Det skal betalast eit årleg gebyr for kontroll og tilsyn av anlegg ol. som nemnt i § 5-1.
Gebyret blir rekna per anlegg. Det årlege gebyret blir belasta eigar av anlegg.
Kapittel 6. Gebyr for sakshandsaming og kontroll av fetthaldig avløpsvatn
§ 6-1. Verkeområde
Kapittelet gjeld gebyr for sakshandsaming og kontroll/tilsyn kommunen har med påslepp av fetthaldig avløpsvatn frå verksemd, jf. kapittel 15A i forurensningsforskriften.
§ 6-2. Sakshandsamingsgebyr for handsaming av søknad om påsleppsløyve
Det skal betalast eit gebyr for sakshandsaming ved:
1. Søknad om løyve til påslepp av fetthaldig avløpsvatn frå verksemd.
2. Søknad om endring av løyve til påslepp av fetthaldig avløpsvatn frå verksemd.
Gebyret blir belasta tiltakshavar.
§ 6-3. Årleg gebyr for kontroll/tilsyn av fettutskiljarar
Det skal betalast eit årleg gebyr for kontroll og tilsyn av verksame fettutskiljarar.
Gebyret blir rekna per fettutskiljar.
Gebyret for kontroll og tilsyn blir belasta eigar av fettutskiljar.
Kapittel 7. Gebyr for tilsyn med forbod mot fyring med mineralolje
§ 7-1. Verkeområde
Kapittelet gjeld gebyr for tilsynet kommunen gjer i samband med forbodet mot fyring med mineralolje etter forskrift om forbud mot bruk av mineralolje til oppvarming av bygninger.
§ 7-2. Eingongsgebyr for tilsyn
Det skal betalast eit eingongsgebyr ved tilsyn. Gebyret differensierast mellom type bustad:
1. Einebustad/ bustader med inntil 4 bueiningar.
2. Bustader med fleire enn 4 bueiningar/andre bygg.
Gebyret blir belasta heimelshavar.
Kapittel 8. Ikraftsetjing
§ 8-1. Ikraftsetjing
Forskrifta trer i kraft frå dd.mm 2025.
Sist oppdatert