Handtering av slakteavfall frå hjortevilt

Jakta er godt i gang, og kommunen vil minna om god praksis ved handtering av slakteavfall frå hjortevilt.

For å ta vare på miljøet og unngå konfliktar med andre brukarinteresser, oppmodar kommunen til følgjande:

• Slakteavfall kan gravast ned eller leggjast ut i eigna område dersom det ikkje er påvist skrantesjuke (CWD) eller andre sjukdomar som krev særskilt handtering.
• Massedumping av slakteavfall er ikkje tillate.
• Avfallet skal ikkje plasserast nær drikkevasskjelder, brunnar, vatn, elvar eller bekkar.
• Det skal takast omsyn til bustader, friluftsområde, turstiar og andre område med allmenn ferdsel.
• Slakteavfall skal ikkje plasserast slik at det skaper vesentlege luktproblem eller er til sjenanse for naboar og andre brukarar av området.
• Ved mistanke om sjukdom hos viltet skal Mattilsynet kontaktast for råd om vidare handtering.

Lista er ikkje uttømmande. Det er den enkelte jeger -og vald ansvarlege som har ansvar for at slakteavfall vert handtert på ein måte som ikkje medfører forureining eller unødige ulemper for omgjevnadene.

Lukke til med jakta!