IT-sjef Ronny Raudstein (t.v.), initiativtakar Remi Nerhus og ordførar Vegard Bjørnevik er alle glade for at kameraovervakinga av kaiområdet og venterommet i Rosendal no er på plass.
Kameraovervaking på plass på kaien i Rosendal
– Kjekt å sjå eit innbyggjarinitiativ bli realitet, seier ordføraren om kameraa som no er i drift ved kollektivterminalen og kaien i Rosendal.
I etterkant av nokre hærverkepisodar var Remi Nerhus på døra til ordførarkontoret og snakka varmt om kameraovervaking av kaien i Rosendal. Eit godt år seinare er kameraa på plass og i drift.
– Remi har vore veldig på og kome med tips om at dette har det vore behov for. Det har fleire av oss sett at han har rett i, og difor er kamera endeleg på plass. Dette var eit godt initiativ! seier ordførar Vegard Bjørnevik.
– Det var litt tull og tøys her, seier Remi Nerhus om kvifor han lanserte kameraplanane for ordføraren.
Det er ulike grunnar til at det har tatt tid, blant anna har prosjektet blitt utvida til å omfatta andre stader i kommunen.
Bjørnevik og Nerhus peikar på kor kamera er plassert, medan Raudstein er litt ukomfortabel med denslags fingerspråk.
– Det er eit tryggleikstiltak. Litt skadeverk og eit branntilløp speler inn, tryggleik i hamneområdet og eit drivstoffanlegg som det er greitt halda eit auge med er også faktorar i totalvurderinga, seier Bjørnevik vidare.
Kamera vart montert før nasjonaldagen, men skilta som varslar at dette er eit kameraovervaka område måtte koma på plass før ein kunne aktivera kamera.
– Men det er ikkje live streaming, og det er svært avgrensa kven som har tilgang til å sjå på opptaka, forsikrar IT-sjef Ronny Raudstein.
Sektorane som blir overvaka er inne i venterommet og kaiområda som er kommunen sine.
Området som er overvaka er tydeleg merka.
Sist oppdatert