Nytt forslag til kommuneplanens arealdel 2026

I denne artikkelen er revidert forslag til ny arealdel av kommuneplanen publisert.

Her finn du lenker til plankart og plandokument slik dei ligg føre per april 2026. Materialet er omfattande, og det vil kome nokre justeringar og rettingar etter kvart. Føremålet med denne publiseringa er først og fremst å gje politikarane i Kvinnherad kommune høve til å setje seg grundigare inn i planforslaget enn det som vanlegvis er mogleg gjennom ordinær publisering i samband med møteinnkallingar.

Planforslaget vert lagt fram til behandling i plan-, teknikk- og miljøutvalet 5. mai, og deretter i kommunestyret 21. mai, med sikte på vedtak om høyring og offentleg ettersyn. Dersom kommunestyret vedtek dette, vert planforslaget sendt på høyring våren/sommaren 2026. Høyringa vil då bli særskilt publisert, kunngjort og annonsert, og informasjonen vil erstatte innhaldet i denne artikkelen.

Lenkene under peiker til dei viktigaste plandokumenta. Dei fleste dokumenta er framleis til intern kvalitetssikring, korrektur og liknande og kan verte oppdatert undervegs – publiseringsdato for versjonen er vist.

Tips til kartvisinga: Slå av/på kartlag i Kommuneplan under arbeid for å gjere kartet betre leseleg.vil

NB: Dette er filer under arbeid, og det gjeld også for publiseringa av vedlegga. Alt vil Ikkje vera på plass under den første publiseringa av denne saka.

Kort om planforslaget

Plan- og bygningslova krev at alle kommunar har ein samla kommuneplan med samfunnsdel og arealdel. Arealdelen er eit overordna styringsverktøy som viser korleis arealbruk skal støtta langsiktig samfunnsutvikling. Gjeldande arealdel i Kvinnherad vart vedteken i 2018, og rulleringa starta kort tid etter. Samfunnsdelen Kvinnherad 2050, vedteken i 2022, har lagt viktige føringar for den reviderte arealdelen, særleg når det gjeld vekstmål og senterstruktur.

Forslag til ny arealdel vart sendt på høyring i 2023 og fekk stort engasjement, med om lag 200 merknader. Fleire statlege og regionale instansar kom med merknader og motsegner som kravde nærare dialog og justeringar. Etter høyringa har kommunen hatt omfattande kontakt med styresmaktene, både i planforum og gjennom dialogmøte. Endringar i plan- og bygningslova i 2025 har òg opna for nye løysingar. Dette har samla sett gjort det naudsynt med ei ny full høyring av planen.

Motsegner frå mellom anna NVE og Fiskeridirektoratet har handla om naturfare, konsekvensutgreiingar og utfylling i sjø og vatn, og desse er no avklarte gjennom nye undersøkingar og justeringar. Merknader frå Statsforvaltaren har bidrege til ein meir lesbar og presis plan, med betre senterstruktur, sterkare jordvern og tydelegare krav til tryggleik.

Planen deler kommunen inn i 23 geografiske soner, noko som skal gi betre oversikt og betre styring av byggjekvotar i område for spreidd bygging i landbruks-, natur- og friluftsområde. Arealdelen legg til rette for moderat folketalsvekst fram mot 2050 og sikrar areal for bustader i heile kommunen. Samstundes er fleire større næringsområde tekne ut av omsyn til natur og miljø, medan nye næringsareal er foreslått der tilhøva ligg betre til rette.

Kommunedirektøren vurderer at planen samla sett gir gode rammer for berekraftig utvikling av Kvinnherad, og at det reviderte planforslaget i hovudsak svarar ut innkomne merknader.