Sterk reaksjon på vedtak om vern av Ytre Hardangerfjorden

Regjeringa har i dag, fredag 13. februar, vedteke å etablera vern av Ytre Hardangerfjorden. Kommunane Stord, Kvinnherad og Tysnes reagerer sterkt på både prosessen og innhaldet i vedtaket.

– Dette grip for sterkt inn i vårt høve til å forvalta eige areal og svekkjer det lokale sjølvstyret. Vedtaket kan svekka planane for industrisatsing i regionen og Sunnhordland sine moglegheiter for vidare satsing innan havvind, marin og maritim innovasjon. Vi ser òg utfordringar knytt til framtidige energioverføringsanlegg i form av sjøkabel, og dette avgrensar i stor grad handlingsrommet for langsiktig samferdsleplanlegging i vår felles bu- og arbeidsmarknadsregion, seier ordførar Vegard Bjørnevik.

Kommunane peikar på at det ikkje har vore signalisert at eit slikt vern var nært føreståande. Etter fem år utan konkrete signal, og med siste politiske debatt i 2021, kjem vedtaket no med éin dags varsel før det blir fatta i statsråd.

Det ligg allereie oppdrettsanlegg i området, og kommunane meiner det er fleire uavklarte spørsmål knytt til korleis vernet vil slå ut i praksis.

– Kva med oppankring av fartøy eller flytande installasjonar i området? Og kva konsekvensar vil vedtaket om fredning kunna få for utslepp frå land i området? For å sikra både miljøomsyn og vidare verdiskaping, er det avgjerande med føreseielege rammevilkår og tett dialog mellom statlege styresmakter og dei lokalsamfunna som blir direkte råka, seier fungerande ordførar Trond Borg.

– For oss i Stord, som i si tid var positive til vern, er det prosessen som er mest utfordrande. At ein no utan vidare vedtek vern, noko som sist vart debattert i 2021, kan berre karakteriserast som lite tillitsvekkjande. Dei som no sit i lokalpolitikken kan ha andre vurderingar enn det ein hadde tidlegare. Dette burde vore gjort gjennom ny kontakt og dialog med dei involverte kommunane, seier ordførar Sigbjørn Framnes.

Ytre Hardangerfjorden, til liks med resten av norskekysten, har gjennom generasjonar lagt grunnlag for busetnad, arbeidsplassar og verdiskaping. Akvakulturnæringa er ein berebjelke i regionen, både lokalt og nasjonalt.

Kommunane forventar no tett dialog med staten for å få avklart konsekvensane av vedtaket og sikra føreseielege rammevilkår for næringsliv og lokalsamfunn.

Vegard Bjørnevik, ordførar Kvinnherad kommune

Trond Borg, fungerande ordførar Tysnes kommune

Sigbjørn Framnes, ordførar Stord kommune