Julekonsert i rådhuskantina

Juleklassikarar og eksotisk vise frå Sverige stod på programmet då kulturskulelærarar heldt ved like førjulstradisjon.

Ingvald T. Nilsen-Nygaard (gitar), Maria Malmsten (song), Yuko Shuto (piano) og Nikolay Balbekov (trommer) var med rektor og saksofonist Kiril Zimin då kulturskulelærarane laga til førjulskonsert i rådhuskantina under lunsjen måndag.

Om finrekninga er å lita på, var dette ein tradisjon som starta for åtte år sidan, ein tradisjon som definitivt er verd å halda på.

I alt serverte kvintetten ti songar og melodiar medan dei rådhustilsette fortærte lunsj, julebrødkake og gløgg. Det var spenn i den musikalske førjulsgåva, frå «Mitt hjerte alltid vanker» via den svenske tradisjonsvisa om Sankt Staffan (Stefanus i norsk tradisjon) til dei meir amerikaniserte klassikarane som «Let it snow» og avsluttingsnummeret «Rockin’ around the Christmas Tree».

I sum var det ei gjevande og stemningsfull stund. Tusen takk for konserten, me ser allereie fram til neste gong kulturskulelærarane kjem på besøk!