Rosar stor lokal innsats i sløkking av skogbrann

Minner om at det framleis er stor skogbrannfare i Kvinnherad.

Onsdag kveld klokka 2040 gjekk alarmen om skogbrann på Varaldsøy. Sløkkinga pågjekk gjennom natta.

– Då alarmen gjekk rykte branntroppen på Varaldsøy ut, i tillegg til at eg og to frå Rosendal reiste til Varaldsøy, fortel vakthavande for Kvinnherad brann og redning Are Blokhus.

Det vart fort observert opne flammar i skogen, og i byrjinga var det eit 80 til 100 kvadratmeter stort areal som brann. Det var etter alt å døma eit av dei mange lynnedslaga onsdag kveld som starta brannen.

– Den store utfordringa var at det skjedde oppe i Glebakkane, og me måtte leggja ut 550 meter med slangar for å få vatn fram til brannstaden, som låg langt i frå bilvegen, opplyser Blokhus.

Den vidgjetne dugnadsviljen og -evna til Varaldsøyfolket viste seg igjen, blant anna ved at dei stilte med ATV som tok brannslangar med seg innover i terrenget, tre bønder kom med gyllevogner med vatn til slangane og dei bidrog i sløkkearbeidet.

– Og seinare kom dei med pastasalat og kaffi slik at me kunne halda det gåande gjennom natta. Me fekk framifrå forpleiing, og det er me veldig takksame for, rosar Blokhus.

Torsdagen går til å opprydding og det han kallar nullstilling.

– Eg har med meg litt mannskap no, og skal hjelpa til med å gjera utstyr og bilar klare til neste utrykking. Me har blant anna ein halv kilometer med brannslangar å kveila opp, utdjupar vakthavande.

Framleis skogbrannfare

Brannen vart meldt sløkt klokka fem torsdag morgon. Blokhus gjer merksam på at det framleis er stor skogbrannfare i Kvinnherad.

– Det skal meir enn litt regnbyer til for at den skal gå over. Her på Varaldsøy brann det i molda fordi det er så tørt, så me oppmodar folk til halda fram med å vera varsame og aktsame med bruken av eld.