Vårspretten 2025 - No er det ein tradisjon!

For tredje år på rad inviterer Ungdomsteamet, Nattcaféen, Frivilligsentralen, Kvinnherad Arena og frivillige eldsjeler til "Vårspretten" - eit rusfritt arrangement for ungdomar i Kvinnherad!

Datoen er sett til 30. april i Kvinnherad Arena, og vi ser fram til ein kveld full av spanande og kjekke aktivitetar. Blant anna kan ein vere med på innebandy, volleyball, blaze pods, Just Dance-diskotek, spele PlayStation og mykje meir. NAF stiller med Veltepetter og Mytelauget (Rollespelklubben) kjem! I tillegg vert det servert gratis pizza til alle.

Arrangementet varer frå kl. 18:00 til 00:00, og det vert sett opp gratis buss heim etter arrangementet for dei som treng det. I år har vi laga til påmelding til buss, slik at vi ser kor stort behovet er.

Vi er glade for at vi i år har fått støtte frå Kvinnheradstiftinga, noko som gjer det mogleg å arrangere Vårspretten for tredje gong.

Treng mange frivillige

For å gjennomføre arrangementet på best mogleg vis treng vi også i år mange frivillige. I fjor hadde vi rundt 70 frivillige med oss som gjorde ein formidabel innsats. Vi oppfordrar foreldre, eldsjeler og andre til å melde seg som frivillig via Friskus Lenke til et annet nettsted, åpnes i nytt vindu.. Dei frivillige frå tidlegare år melder om ein kjekk kveld saman med ungdommar frå heile kommunen.

Vi gler oss til å sjå deg på Vårspretten 2025!