Kvikkleireområdet på Tofte/Sæbø

Kommunen får i desse dagar overlevert ein rapport om overvasshandtering frå Norconsult, og vil framover arbeida med å prosjektera tiltak for å ha kontroll med vatnet i området. Dette vert truleg omfattande og kostnadskrevjande tiltak, og kommunen vil ta initiativ til vidare dialog med NVE og Vestland fylkeskommune (som har ansvar for fylkesvegen gjennom området) for å avklara finansiering og gjennomføring.

I førre veke fekk kommunen ei uromelding frå ein innbyggjar om eit lite søkkehol i kanten av vegen Nedre Sæbø i bakken ved tidlegare Tofte skule. Kommunen hyrte ein geoteknikar frå Norconsult som var på staden torsdag kveld for å gjere ei førebels vurdering. Tilsette i VA-eininga til kommunen har grundig sjekka leidningsnettet på staden og gjennom helga var dei på staden tre gonger kvart døger for å sjå om det kom endringar i situasjonen.

Måndag føremiddag drøfta kommuneleiinga tiltak i dei to kvikkleireområda med fagfolk i NVE og Norconsult. Fagfolka konkluderte med at det ikkje er særskilt fare knytt til søkkeholet som no vart oppdaga. Kommunen vil saman med Norconsult setja opp eit program for å overvaka situasjonen i tida fram til det vert klart kva langsiktige tiltak som skal gjennomførast.