Vandreturisme ved Folgefonna

Kvinnherad er eitt av seks nye prosjekt som er teken opp i programmet Naturarven som verdiskapar i 2010. Totalt er no 15 prosjekt med i programmet. Prosjektet vil føregå dei næraste tre åra. Svein Ingvald Opdal er involvert som prosjektleiar for Folgefonna nasjonalparksenter.

Åtte ferdselsruter

Dei fem kommunene Odda, Ullensvang, Jondal, Etne og Kvinnherad skal saman oppgradere åtte gamle ferdselsruter og turiststiar rundt Folgefonnhalvøya. Ferdselsårane skal gjerast meir tilgjengelige for turgåarar, og formidle naturverdiar innan geologi, plante- og dyreliv, klima og vatn, samt kulturminne. Inntektsgjevande aktivitet Prosjektet skal gje grunnlag for at fleire blir opptekne av naturverdiane i området, og at det kan startast inntektsgjevande aktivitet i tilknyting til desse. Tilrettelegginga skal også bidra til auka trivnad for lokalbefolkninga, slik at det blir attraktivt å bu og arbeide i bygdene rundt Folgefonna nasjonalpark.

Parkering og toalett i Bondhus

Ein vil byggje ut i samband med den gamle turistløypa over Folgefonna som startar i Sundal i Kvinnherad, går opp Bondhusdalen til hytta Fonnabu ved brekanten, over fonna til hytta Holmaskjær og ned til Egne Hjem, Tokheim i Odda. Sundal manglar parkeringsplass for ferdsel i Bondhusdalen. Nytt areal til parkeringsplass er kjøpt, men plassen skal opparbeidast og tilretteleggjast. Her bør det også kome eit toalett. Det skal setjast opp fleire informasjonsskilt frå Bondhusdalen og opp til Fonnabu og tilretteleggjast raste- og utsiktsplassar. På Egne Hjem skal det lagast informasjonsskilt, raste- og utsiktsplassar i stien opp til Holmaskjær. Totalkostnad på parkeringsplass, toalett og raste- og utsiktsplassar er kalkulert til 910.000 kroner, derav 840.000 kr til utbetring i Bondhus.

Merka ruter

Ein ønskjer å merke rutene i samsvar med merkesystem brukt i Arena-prosjektet ”Innovativ Fjellturisme”. Då blir rutene merka etter vanskegrad. Ein vil utbetre og sikre bruer med passasjar i landskapet og gjera delar universelt utforma. Ein vil tilretteleggja for parkering, utsiktspunkt, observasjonsplassar og toalett i tilknyting til rutene. Kommunane vil medverke til utdanning av lokalt guidekorps med høg kompetanse innan dei naturfagleg verdiane som rutene beskriv. Det skal utviklast opplegg for elevar i den lokale grunn- og vidaregåande skule, som gjev identitetsbygging rundt Folgefonna. Alle prosjekt som er tilslutta verdiskapingsprogrammet skal på to nettverkssamlingar i året, og den første er 7. – 9. september 2010 på Skinnabu i Vinje kommune.

I det følgjande kan ein sjå oversikt over alle prosjekta, samt plan for finansiering.

Dei ulike prosjekta er:

• Blådalen frå Matre - Møsevatn – Kjerringbotn

• Rullestad

• Langfoss

• Buardalen

• Egne Hjem – Sundal

• Agatunet – streifløypa – Digrahaug

• Pilgrimsvegen Jondal – Ullensvang mellom Flatabø - Reiseter

• Nasjonalparklandsbyen Jondal - Sumarskisenteret – Skjæret – Hanakamb – Måge

Finansieringplan:

Kommunane kr. 3.135.000

Andre offentlege instansar kr. 700.000

Sunnhordland kraftlag kr. 300.000

Tilskot frå verdiskapingsprogrammet kr. 4.135.000

Totalt kr. 8.270.000

Finansiering vil vera: Kommunane, regionrådene i Hardanger og Sunnhordland, Hordaland fylkeskommune, fylkesmannens Landbruksavdeling, Sunnhordland kraftlag, Innovasjon Norge - Hordaland, Statens Vegvesen og verdiskapingsprogrammet.