Nynorsk i Uskedalen Barnehage har ført til ”boklansering” og dokketeater

Målet med prosjektet er å styrkje språkstimulering på nynorsk i barnehagen. Prosjektet har blitt ein integrert del av det daglege arbeidet. Hos oss kom flotte bøker på nynorsk til barnehagen. Desse har blitt brukt pedagogisk opplegg i barnehagen. Nokre bøker fenga ungane meir enn andre. ”Herr Spiss” vart ein av favorittane. Samtidig grydde det fram ei interesse for handdukker blant ungane.

1.klasse ved Uskedalen Skule inviterte oss på dokketeaterframsyning der dei hadde laga dokkene sjølve, og dette likte ungane godt. I februar blei vi invitert på ei teaterframsyning om ”Herr Spiss” i regi av Den Kulturelle Nistepakken. Framsyning var eit einmannsteater der skulekameratane fekk vere med å leike rollefigurane etter framsyninga. No begynte ting å skje.

Barna sin medverknad står sentralt i barnehagen. Dei vaksne i barnehagen greip tak i det dei såg ungane leikte og viste interesse for. Dermed var bokproduksjon og dokketeaterproduksjon i gang. Ungane har laga historier og teikna teikningar til historiene, og dei har sjølve plukka ut kva teikning som skal stå til dei ulike delane av historia. Ungane har også laga dokker til dokketeater. Ei gruppe har laga dokkene fyrst og historie etterpå , medan ei anna gruppe har laga historie først og dokkene etterpå. Med foreldre, besteforeldre og ordførar på plass var boklansering med dokketeaterframsyning eit faktum. Tysdag 14. juni framførte ungane dokketeater med glans, og boka blei presentert på det flotte nye biblioteket i oppvekstsenteret. Dette var kjekt.

Dette prosjektet har gitt oss i Uskedalen Barnehage ein veg vi ynskjer å utforske meir. Vi har søkt om vidareføring av prosjektet og fått positivt svar på søknaden. Språket binder identitet, kultur og følelsar saman. Vi ynskjer barn som kjenner det språklege og kulturelle mangfald i barnehagen. Vi ynskjer fokus på språkstimulering og lesing i litt andre omgjevnader enn vanleg i barnehagen. Natur og uteliv er ein viktig del av Uskedalen Barnehage. Prosjektet vidare har vi gitt namnet ”Natur og kultur hand i hand”. Vi vil ta historier og bøker med ut på tur og bruke naturen som kulisser til dramatisering og leiking av det vi les.

Av Marianne Lyngnes Bjørnebøle

Styrar Uskedalen Barnehage