Vann tur til Svalbard

Sjef for konkurransen er Ole anders Nøst, som er forskar i fysisk oseanografi ved Norsk Polarinstitutt. Tysdag 5. oktober kom han til Åkra og kunne annonsere kven av dei tre gruppene i ungdommsskulen som var dei heldige vinnarane. Desse er Jostein Vågen og Martha Tjelmeland i 9. klasse samt fire elevar som gjekk ut i fjor: Kari Janne Furdal, Jon Sigvald Tjelmeland, Anna Wågen og Sondre Bauge Vika. Lærar Anne Grete Kjærstad Berge skal også vera med på opplevingsferd til Svalbard. Turen bli dekka av Polarinstituttet.

Norsk Polarinstitutt hadde invitert alle ungdomsskulane i landet til å delta på ICE Fimbulisskule for å lære meir om klimaforsking. Blant deltakarane skulle det trekkjast ut ein vinnar til å dra til Svalbard. Det var berre Åkra skule som deltok med tre grupper. Elevane følgde forskarane over nettet på oppdraget deira på Sørpolen, der mellom anna Nøst deltok. Etterpå skreiv vinnargruppa ei oppgåve der dei tok føre seg mykje av klimaproblema som skjer i Antarktis.

Vinnarane skal innom Polarinstituttet i Tromsø før dei drar vidare til Longyearbyen. Det er første gong at Martha og Jostein skal til Svalbard, og dei vart veldig glade då deira namn vart ropt opp. Ungdomsskulen feira med marsipankake.